Narayana murthy biography in marathi rava

इन्फोसिसचे सह-संस्थापक एन. आर. नारायणमूर्ती यांचा जन्म २० ऑगस्ट १९४६ मध्ये कर्नाटकातील सिद्लाघत्तामध्ये झाला. मध्यमवर्गीय कुटुंबात जन्मलेले नारायण मूर्ती ८ भावंडांमध्ये पाचव्या नंबरवर होते. शालेय शिक्षण पूर्ण केल्यानंतर त्यांनी १९६७ मध्ये नॅशनल इन्स्टिट्यूट ऑफ इंजिनिअरिंग, मैसूर यूनिव्हर्सिटीमधून इलेक्ट्रिकल इंजिनिअरिंगची पदवी घेतली.

त्यानंतर १९६९ मध्ये आयआयटी कानपूरमधून एमटेक केलं. त्यानंतर त्यांनी १९७० च्या अखेरीस पुण्याच्या पाटनी कंप्यूटर्समध्ये असिस्टेंट मॅनेजर म्हणून नोकरीची सुरुवात केली.

एन. आर. नारायण मूर्ती यांचा विवाह सुधा मूर्ती यांच्यासह १० फेब्रुवारी १९७८ रोजी बेंगळुरूत झाला. लग्नानंतरच त्यांच्या आयुष्यात मोठे बदल होण्यास सुरुवात झाली.

लग्नानंतर त्यांनी आपली कंपनी सुरू करण्याचा विचार केला आणि हीच जिद्द ठेवली. त्यांनी सर्वात आधी सॉफ्टरोनिक्स नावाने कंपनी सुरू केली, पण ती यशस्वी झाली नाही. यानंतरही नारायण मूर्ती आपल्या जिद्दीवर अडून होते. याच जिद्दीतून, मेहनतीतून त्यांनी सर्वात मोठी कंपनी उभारली.

नारायण मूर्ती यांनी १९८१ मध्ये आपल्या सहा सहकाऱ्यांसह आपली कंपनी सुरू करण्याची योजना आखली.

त्यावेळी नारायण मूर्ती आपल्या पत्नी सुधा यांच्यासोबत एक खोली असलेल्या घरात राहत होते. कंपनीचं नाव इन्फोसिस असं ठरलं. या कंपनीत आपला हिस्सा देण्यासाठी त्यांनी पत्नीकडून १० हजार रुपये उधार घेतले. अशाप्रकारे पुण्यातील एका अपार्टमेंटमधून कंपनीची सुरुवात झाली. १९८३ मध्ये कंपनीचं मुख्यालय पुण्यातून बेंगळुरूमध्ये ट्रान्सफर करण्यात आलं. नारायण मूर्ती अनेक कार्यक्रमात पत्नीकडून पैसे उधार घेतल्याची गोष्ट सांगतातही.

इन्फोसिसचा बिजनेस अमेरिका, इंग्लंडसह जगभरातील अनेक देशांमध्ये आहे. १९८१ पासून २००२ पर्यंत नारायण मूर्ती कंपनीचे सीईओ राहिले आणि त्यांच्या नेतृत्वाखालीच ही कंपनी जगभरातील मोठ्या कंपन्यांच्या बरोबरीला पोहोचली. १९९१ मध्ये इन्फोसिस पब्लिक लिमिटेड कंपनीत बदलली आणि १९९९ मध्ये याचे शेअर्स अमेरिकी स्टॉक मार्केट NASDAQ मध्ये लिस्ट झाले.

सध्या इन्फोसिस मार्केट कॅपच्या हिशोबाने देशातील सर्वात टॉप-१० कंपन्यांमध्ये सामिल आहे. याचं मार्केट कॅप ६,७०,९२०.६४ कोटी रुपये आहे.

फोर्ब्सच्या रियल टाइम लिस्टनुसार, भारतीय उद्योगपती आणि इन्फोसिसचे सहसंस्थापक एन. आर. नारायण मूर्ती यांचं एकूण नेटवर्थ ३.८ अब्ज डॉलर आहे. नारायण मूर्ती अनेकदा कार्यक्रमात एक गोष्ट सांगतात, ती यशाची गुरुकिल्ली मानली जाते.

ते म्हणतात, तुम्ही कोणत्या संस्थेतून शिक्षण घेतलं आहे, यामुळे कोणताही फरक पडत नाही. तुम्ही केवळ तुमच्या मेहनतीनेच तुमचं संपूर्ण आयुष्य बदलू शकता. नारायण मूर्ती यांनी अनेक पुरस्कारांनीही गौरवण्यात आलं आहे. २००० रोजी त्यांना पद्मश्री पुरस्काराने सन्मानित करण्यात आलं होतं. त्यांनंतर २००८ मध्ये पद्मविभूषण पुरस्काने त्यांना गौरवण्यात आलं होतं.

२००८ मध्ये फ्रान्स सरकारनेही त्यांना ऑफिसर ऑफ द लीजन ऑफ ऑनरने सन्मानित केलं होतं.

नारायण मूर्ती यांना एक मुलगा रोहन मूर्ती आणि एक मुलगी अक्षता मूर्ती आहे. अक्षता यांचा विवाह ब्रिटनमधील पंतप्रधान पदाचे उमेदवार आणि ब्रिटनचे माजी अर्थमंत्री ऋषी सुनक यांच्याशी झाला आहे.

त्यांची मुलगी अक्षता या संपत्तीच्या बाबतीत ब्रिटनच्या राणी एलिझाबेथ यांच्यापेक्षाही जास्त श्रीमंत आहे. जावई ऋषी सुनक यांनाही नारायण मूर्ती यांच्या संघर्षाचा अभिमान आहे. ते अनेकदा याबाबत बोलताना दिसतात. माझ्या सासऱ्यांकडे काहीही नव्हतं. केवळ एक स्वप्न आणि माझ्या सासू बाईंनी दिलेले काही पैसे त्यावरुन त्यांनी जगातील सर्वात मोठी कंपनी उभारली.

इंग्लंडमध्येही या कंपनीचे हजारो कर्मचारी आहेत.